Eskualdeko enpresek eskualdeko langabeak kontratatu ditzan sustatzeko, Urola Kostako Udal Elkarteak dirulaguntza deialdi bat egin du. Ekimena enplegua sustatzeko 2020ko planaren barruan dago eta Lanbide-Euskal Enplegu Zerbitzuak finantzatzen du. Guztira, 291.000 euro emango dira dirulaguntzatan.
Deialdi honen helburua bikoitza da: enpresei laguntzea langileak kontratatzeko gastuei aurre egiten eta enplegu-politika aktiboak indartzea, langabeen kontratazioa errazteko. Lehentasuna izango dute emakumeak kontratatzen dituzten eskabideek; hala, 22 dirulaguntza gordeko dira emakumeak kontratatzen dituztenentzat.
Kontratuen ezaugarriak eta epeak
Diruz lagunduko diren kontratuek honako ezaugarriak izan behar dituzte: hiru edo sei hilabeteko iraupena eta lanaldi erdia edo osoa izatea. Horrez gain, kontratazioak data jakin batzuetan egina izan beharko du: sei hilabetekoak 2020ko urtarrilaren 1a eta 2020ko abenduaren 31a bitartean egin beharko dira; hiru hilabetekoak, berriz, 2020ko urtarrilaren 1etik 2021eko martxoaren 31ra.
Kontratuaren eta kontratatzen den pertsonaren ezaugarrien arabera, dirulaguntzen zenbatekoa 1.500 eta 9.000 euro artekoa izan daiteke. Bete behar diren baldintzak, prozedura, eskabideak baloratzeko irizpideak eta gainerako xehetasunak oinarrietan daude zehaztuta.
Eskabideak Udal Elkartearen egoitza elektronikoaren bidez aurkeztu behar dira. 2021eko urtarrilaren 29an amaituko da eskabideak aurkezteko epea.
Argazkia: EiTB