Igandean, apirilaren 14an, Laburbira, euskarazko film laburren zirkuito ibiltaria, Getariara iritsiko da. Euskaltzaleen Topaguneak sustatutako egitasmoa da bi helburu nagusirekin: batetik, euskal zinemagintza hauspotzea, zinemagileei beren lanak erakusteko aukera emanaz; eta bestetik, herritarrei euskaraz sortutako film-laburrak ezagutaraztea.
Aurtengoa Laburbiraren XXI. edizioa izango da eta Euskal Herrian ekoiztutako ondoko zortzi film laburrek osatzen dute bilduma: Dena asmatuta dago (Jone Arriola), Katalinaren zoria (Guillermo Ordas), Erro (Amaia Lejarreta), Babesa (Ander Iruretagoyena), Mundu berri bat (Mikel Alvarez), Zirrara (Ane Cuesta), Talkak (Ilune Diaz eta Jordi Nuet) eta Betizu buru (Kim Maiteny Munoa).
19:00etan hasita, Iturzaeta Herri Eskolako aretoan egingo da emankizuna. Sarrerak, jada, eskuratu daitezke turismo bulegoan, hiru eurotan. Emanaldiaren egunean bertan, leihatilan ere, eskuratu ahalko dira.